Адыгей Университетым и ансамбль «Нарт»-м хэт къэфакIуэхэм къагъэлъэгъуэнущ Урысейр Италием, Сицилие островым  деж щекIуэкI фольклорнэ фестиваль «Миндальное цветение»-м, жиIащ адыгэ щIэныгъэ Iуэху зезыхуэ фонд "Адыги" Къалмыкъ Юрэ и цIэр зезыхьэм.

Фестивалыр екIуэкIынущ мазае мазэм и 5-м щыщIидзауэ 10-м нэгъунэ. А зэманхэращ Сицилие островым миндаль жыгхэр щыгъагъэр. Жыг дахэу гъэгъахэм и жьауэм деж зэхуишэсащ дунейпсом фольклорнэ ансамблыу иIэ къуомыр. Ахэм яхэтынущ дэ ди лъэпкъэгъухэри Адыгей республикэм щыщ ансамбль «Нарт» зи цIэр. Махуитхум и кIуэцIым фестивалым къекIуэлIауэ хъуам къагъэлъэгъуэныщ ягъэхьэзыра къафэхэмрэ уэрэдхэмрэ. Абы къинэмыщIауэ къекIуэлIахэм ирагъэлъэгъунущ Сицилие островым и дахагъхэр.

Адыгей ансамблым Урысейр илъэс етIуанэ хъуауэ къегъэлъагъуэ Сицилием деж екIуэкI фестивалым. Мы зэм къэфакIуэхэм ягъэлъэгъуэныу мурад ящIащ Ищхьэрэ Кавказым ис лъэпкъ псоми я къафэ пычыгъуэ цIыкIу зыбжанэ зэхагъэувэу хьэщIэхэм я пащхьэ иралъхьэныу. Ансамбль «Нарт»-м и къафэхэр зыгъэув ШэгъукIэ Казбек зэрыжиIэмкIэ къамыгъэлъэгъуэныу  Iэмал иIэкъым сэшхуэ зыхэт къафэ «Псым деж къэхъуа банэ» зи цIэр.

«Мы гъэм Сицилие островым къэтшащ дгъэлъэгъуэныу занщIыу къафитI - минут 15-рэ 20-рэкIэ екIуэкIыу. Италием щыпсэухэмрэ, хьэщIэхэмрэ я пащхьэ къитлъхьэнущ, зэи ямылъэгъуэ къафэ зыбжанэ: «Хъыджэбз къафэ», «ЩIалэхэм я къафэ», абы къинэмыщIауэ ядгъэлъэгъунущ жьыдыдэ хъуа зы къафэ «Зафак» и цIэу, итIанэ бэрэбэнауиплIыр къахуеуэнущ «Кавказым и мэкъамэхэр» жыхуиIэ къафэр», - жиIащ ШэгъукIэ Казбек.

Адыгей университетым и проректор Тыгъуз Фатимэ жиIащ, гъэ кIуам ансамбль «Нарт»-м япэ увыпIэ къызэрихьар а фестивал дыдэм Сицилием деж, икIи абы щыгъуэ номинацие къыхуагъэфэщащ «Лъэпкъым и къафэ» жэуэ.

«Иджыри дыхуейщ япэ увыпIэ къэтхьыныу фестивалым деж, ауэ ансамблым къэфакIуэ куэд щIауэ хэт зыкъом хэкIыжахэщ. Абы къыхэкIкIэ хэдгъэхьащ ансамблым къэфакIуэ нэгъуэщIхэр. Догугъэ ди щIыхьыр къаIэтыныу», - жиIащ Тыгъуз Фатимэ.

Фестивалым къызэрилъытэмкIэ коллектив къэфэныу хъуам езыхэм ягъэджэгу мэкъамэ щIэтын хуейщ.