Лэжьыгъэ щхьэпэр и Iэдакъэ къыщIэкIащ Ерокъуэ къуажэм щыпсэу Тхьэкъуахъуэ Уэлид. Ар илъэсих и пэкIэ, Сирием зауэ къыщыхъея нэужь, адэжь хэкум къэIэпхъуэжахэм ящыщщ.

Фигу къэдгъэкIыжынщи, МэшбащIэ Исхьэкъ и «Шэрджэсхэр» романым XVI лIэщIыгъуэм дегъэгъэзэж; «Ридадэм» дыщегъэгъуазэ адыгэ лъэпкъыр къызытехъукIауэ ялъытэ касогхэм я тхыдэ жыжьэм.

Зи гугъу тщIы зэдзэкIыгъэхэр Къэбэрдей Адыгэ Хасэм хьэрып къэралхэм щыпсэу ди лъэпкъэгъухэм ялъигъэIэсыну и мурадщ. Абы и пэ къихуэу а тхылъхэм ящыщ зыкъом щэкIуэгъуэм и 19-м екIуэкIа ДАХ-м и XII зэхуэсышхуэм и лIыкIуэхэм тыгъэ хуащIащ.

МэшбащIэм и романхэу Тхьэкъуахъуэ Уэлид зэридзэкIахэм я бжыгъэр пщIы ирикъуащ. ЖыIэн хуейщ езы Уэлиди зэрытхакIуэр, Сирие Хьэрып Республикэм и ТхакIуэхэм я зэгухьэныгъэм зэрыхэтыр. Куэд дэмыкIыу «Адыгэ псалъэ» газетым и щIэджыкIакIуэхэм Iэмал яIэнущ абы и новеллэхэм къеджэну.